صحت و تندرستی کا وظیفہ

وظائف :صحت و تندرستی

Wazifa for Healing and Good Health"  

تمہید:

آج لوگ گوناگوں مسائل میں مبتلا دکھائی دیتے ہیں ، معاشی ، اخلاقی ، سماجی اور معاشرتی مسائل تو درپیش ہیں ہی مگر آج کے دور میں صحت و تندرستی برقرار رکھنا بھی ایک بہت بڑا مسئلہ بن کر سامنے آیا ہے۔ اَلحمدُ لِلّٰہ دینِ اسلام ہر شعبے میں مکمل راہنمائی کرتا ہے ، اسلامی تعلیمات جہاں عقائد و عبادات ، معاشرت و معاملات اور اخلاق و آداب کے تمام پہلوؤں کو شامل ہیں وہیں حفظانِ صحت اور تندرستی کے معاملات میں بھی اسلام نے ایسا نظام عطا فرمایا ہے جو صحت مند زندگی کی ضمانت ہے۔آئیے :ہم صحت و تندرستی کے حوالے سے وظائف جاننے کی سعادت حاصل کرتے ہیں تاکہ ہم ان وظائف و فیوض و برکات سے خوب خوب برکتیں سمیٹ سکیں ۔ صحت ہماری زندگی کا سب سے بڑا اثاثہ ہے لیکن اس کا احساس تب ہوتا ہے جب ہم اسے کھو دیتے ہیں۔

قراٰنِ کریم ہمارے لئے نہ صرف ایک بہترین ضابطۂ حیات (یعنی زندگی گزارنے کا قاعدہ) ہے بلکہ اسی میں ہمارے لئے دنیاو آخرت کی نجات ہے۔ 

اس کی برکت سے جسمانی و رُوحانی بیماریاں دُور ہوتی ہیں۔

              شفاکی بہترین امید     

ارشاد باری تعالیٰ ہے :

وَنُنَزِّلُ مِنَ الْقُرْاٰنِ مَا ہُوَ شِفَآءٌ وَّ رَحْمَۃٌ لِّلْمُؤْمِنِینۡ

ترجمۂ کنزالایمان: اور ہم قرآن میں اتارتے ہیں وہ چیز جو ایمان والوں کے لئے شفا اور رحمت ہے (پ ۱۵، بنی اسرائیل، آیۃ:۸۲)

مفسرِ قراٰن امام فخرالدین رازی عَلیہ رَحمَۃُ اللّٰہ الْقَوِی فرماتے ہیں:”قراٰنِ کریم ہر طرح کی بیماریوں سے شفا عطا فرماتا ہے وہ روحانی امراض ہوں چاہے جسمانی، قراٰنِ کریم کا امراضِ روحانیہ کے لیے شفا ہونا تو ظاہر ہے ہی اس کی تلاوت کی برکت سے بکثرت امراضِ جسمانیہ سے بھی شفا حاصل ہوتی ہے۔”(

 (تفسیر کبیر،بنی اسرائیل،تحت الآیۃ:۸۲،۷/۳۹۰ ملخصاً)

سبحان اللہ !!

مسلمانو!!!آپ پر تو اللہ پاک کا کتنا کرم ہے کہ کلام مجید آپ کے لیے کتاب شفاہے ۔آئیے ذرا بیمار  کے لیے وظیفہ بھی جان لیتے ہیں ۔

              سورہ فاتحہ ہر مرض کی دوا

حضرت سیّدنا جابر رَضِیَ اللّٰہُ تعالٰی عَنہ سے حضور سراپا نور عَلیہِ الصَّلٰوۃُ و السَّلام نے فرمایا: اے جابر کیا میں تجھے قراٰن میں نازل شدہ سب سے اچھی سورت نہ بتا دوں؟ سیّدنا جابر رَضِیَ اللّٰہُ تعالٰی عَنہ نے عرض کی: کیوں نہیں یارسول اللّٰہ صَلَّی اللّٰہُ تَعَالٰی عَلَیہ وَاٰلہٖ وَ سَلَّم۔تو آپ صَلَّی اللّٰہُ تَعَالٰی عَلَیہ وَاٰلہٖ وَ سَلَّم نے ارشاد فرمایا یہ سورہ فاتحہ ہے مزید فرمایا:”اس میں ہر مرض کے لیے شفا ہے۔

)شعب الایمان، التاسع عشر من شعب الإیمان ہو باب فی تعظیم القرآن، فصل فی فضائل السور و الآیات، ۲/۴۴۹،حدیث: ۲۳۶۷

آپ بیمار ہیں پریشان نہ ہوں ۔اللہ پاک اپنے حبیب ﷺ کے صدقے ضرور آپکو شفاعطافرمائے گا۔ہم بھی آپ کی خوشیوں اور ہنستی مسکراتی زندگی میں خیر و برکت  کی خوشبوبکھیرنے کے لیے وظائف کی صورت میں حاضرہوتے ہیں ۔

حضرت سَیِّدَتُنا عائشہ صدیقہ رَضِیَ اللّٰہُ تَعالٰی عَنہا بیان فرماتی ہیں کہ جب رسول اللّٰہ صَلَّی اللّٰہُ تَعَالٰی عَلَیہ وَاٰلہٖ وَ سَلَّم کے اہل میں سے کوئی بیمار ہوتا تو آپ صَلَّی اللّٰہ تَعالٰی عَلیہ واٰلہٖ وَ سَلَّم اس پر قُلْ اَعُوْذُ بِرَبِّ الْفَلَقِ اور قُلْ اَعُوْذُ بِرَبِّ النَّاسِ پڑھ کر دم فرماتے۔

(مسلم،کتاب السلام،باب رقیۃ (المریض بالمعوذات والنفث، ص ۱۲۰۵، حدیث:۲۱۹۲)

آپ بیماری سے گھبرائیں نہیں بلکہ اپنے پیارے اللہ پاک سے صحت کی امید رکھیں التجاو دعابھی کریں اور وظائف کو بھی جاری رکھیں ۔ہم آپکو ایک اور بہترین دعابتاتے ہیں۔

              زبردست دعا

"اَللّٰهُمَّ رَبَّ النَّاسِ أَذْهِبِ الْبَأْسَ وَاشْفِ أَنْتَ الشَّافِيْ لَا شِفَاءَ إِلَّا شِفَاؤُكَ شِفَاءً لَايُغَادِرُ سَقَماً."

یہ بہت ہی زبردست دعاہے آپ یہ دعا پڑھ کر مریض پر دم کردیجئے ۔

آپ خود بیمار ہیں یا کوئی عزیز گھر یا اسپتال میں بیمار ہے تو ہمت کریں حوصلہ کریں ۔آگے بڑھیں اللہ پاک پر کامل یقین کرکےان وظائف کو پڑھ کر دم کیجئے ۔اللہ پاک نے چاہاتو ضرور  شفاملے گی ۔